திருவனந்தபுரம்: ராகுல் காந்தி நேற்று வயநாட்டில் வேட்பு மனு தாக்கல் செய்தார். முன்னதாக அவர் பிரியங்கா காந்தி மற்றும் ஆயிரக்கணக்கான தொண்டர்களுடன் ரோடு ஷோ நடத்தினார். கடந்த நாடாளுமன்றத் தேர்தலில் கேரள மாநிலம் வயநாடு தொகுதியில் போட்டியிட்டு 4.37 லட்சம் வாக்குகள் வித்தியாசத்தில் வெற்றி பெற்ற ராகுல் காந்தி இந்த தேர்தலிலும் வயநாடு தொகுதியில் போட்டியிடுகிறார். அவரை எதிர்த்து இடதுசாரி கூட்டணி சார்பில் இந்திய கம்யூனிஸ்ட் கட்சி வேட்பாளரான ஆனி ராஜாவும், பாஜ கூட்டணி சார்பில் மாநிலத் தலைவர் சுரேந்திரனும் போட்டியிடுகின்றனர்.இந்த நிலையில் ராகுல் காந்தி நேற்று மதியம் வேட்பு மனு தாக்கல் செய்தார். முன்னதாக கல்பெட்டா புதிய பஸ் நிலையத்திலிருந்து மாவட்ட கலெக்டர் அலுவலகம் வரை அவர் ரோடு ஷோ நடத்தினார்.
இதில் பிரியங்கா காந்தியும் கலந்து கொண்டார். மேலும் வயநாடு நாடாளுமன்றத் தொகுதிக்கு உட்பட்ட மானந்தவாடி, சுல்தான் பத்தேரி, கல்பெட்டா, ஏரநாடு, வண்டூர், நிலம்பூர் மற்றும் திருவம்பாடி ஆகிய 7 தொகுதிகளை சேர்ந்த ஆயிரக்கணக்கான காங்கிரஸ் தொண்டர்களும் இந்த ரோடு ஷோவில் பங்கேற்றனர். ரோடு ஷோ முடிந்த பின்னர் வயநாடு மாவட்ட கலெக்டரும், தேர்தல் அதிகாரியுமான ரேணு ராஜ் முன்னிலையில் ராகுல் காந்தி வேட்பு மனு தாக்கல் செய்தார். அவர் 3 செட் மனுக்களை தாக்கல் செய்தார். அப்போது அவருடன் பிரியங்கா காந்தி, கே.சி.வேணுகோபால், முஸ்லிம் லீக் தலைவர் குஞ்ஞாலிக் குட்டி மற்றும் பலர் இருந்தனர்.