வேலூர் மாவட்டம் காட்பாடியில் நேற்று பயனாளிகளுக்கு இலவச வீட்டுமனை பட்டாக்களை வழங்கிய பின்னர் அமைச்சர் துரைமுருகன் நிருபர்களிடம் கூறியதாவது: ஒன்றிய அரசு திட்டங்களை செயல்படுத்தவிடாமல் தமிழக அரசு தடுப்பதாக பிரதமர் மோடியின் குற்றச்சாட்டு தேவையற்றது. மதுரை எய்ம்ஸ் அவர்கள் கொண்டு வந்த திட்டம்தான். அவர்கள்தான் செயல்படுத்தவில்லை. எங்கள் மீது பழி சொல்வது நியாயம் இல்லை. நாங்கள் தடுத்திருக்கிறோம் என்று ஒரு திட்டத்தை சொல்ல சொல்லுங்கள். மிகப்பெரிய பொறுப்பில் இருப்பவர், நாட்டின் தலைமை பொறுப்பில் இருப்பவர் எந்த திட்டத்தை தடுத்தோம் என்பதை சொல்ல வேண்டும்.
திமுக கூட்டணியை பொறுத்தவரை தொகுதி பங்கீடு ஓரிரு நாட்களில் முடிவடையும். எம்ஜிஆர் மற்றும் ஜெயலலிதா படங்களை போட்டு பாஜவினர் தேர்தல் பிரசாரத்தை தொடங்கி இருப்பதற்கு, அதிமுகவினருக்குதான் ரோஷம், கோபம் வர வேண்டும். தமிழ்நாட்டுக்கு பிரதமர் மோடி 10 முறை கூட வரலாம், யார் வேண்டாம் என்று சொன்னார்கள். இவ்வளவு நாள் திமுகவை பற்றி பேசினாரா பிரதமர்?. தேர்தல் வரும்போது தான் திமுகவை பற்றி பேசுகிறார். ஜல்லிக்கட்டு காலத்தில் வண்டி மாடு ஒரு மாதிரி தலையை ஆட்டும். அதுபோலதான் பிரதமரின் பேச்சு. இதெல்லாம் ஒரு அரசியல் சீசன். அதிமுகவினரின் நேற்றைய போராட்டம் அரசியல்தான். இவ்வாறு அவர் கூறினார்.