காய்கறி மார்க்கெட் முழுவதும் வலம் வந்த மு.க.ஸ்டாலின், அங்கு காய்கறி விற்பனை செய்து கொண்டிருந்த வியாபாரிகளிடம் இந்த காய்கறிகள் எங்கிருந்து வருகின்றன? எவ்வளவு நேரம் வியாபாரம் செய்வீர்கள்? லாபம் கிடைக்கிறதா? என்று கேள்விகள் கேட்டார். மேலும் வியாபாரிகளிடம், நீங்கள் யாருக்கு வாக்களிப்பீர்கள்? என்று கேட்டார். அதற்கு அவர்கள் திமுகவுக்குதான் வாக்களிப்போம் என்று தெரிவித்தனர். அப்போது கனிமொழி எம்.பி.,யை சுட்டிக் காட்டி, இவருக்கு உதயசூரியன் சின்னத்தில் வாக்களியுங்கள் என்று கேட்டுக் கொண்டார்.காய்கறி மார்க்கெட்டில் வியாபாரிகளும், பொதுமக்களும் நடந்து வந்த முதல்வர் மு.க.ஸ்டாலினை ஆங்காங்கே நிறுத்தி ஆர்வமுடன் செல்பி எடுத்துக் கொண்டனர்.
அதன்பின்னர் மீனவர்கள் அதிகம் வசிக்கக்கூடிய லயன்ஸ் டவுன் பகுதிக்குச் சென்ற முதல்வர் ஸ்டாலின் அங்கு 7வது தெருவில் நடந்து சென்று வாக்கு சேகரித்தார். திடீரென முதலமைச்சரை பார்த்த பொது மக்கள் அவருடன் செல்பி எடுத்து மகிழ்ந்தனர். ஒருவர் தனது குழந்தையை முதலமைச்சர் கையில் கொடுத்து போட்டோ எடுத்துக் கொண்டார். பின்னர் அங்கிருந்து முக்கிய வீதிகள் வழியாக தான் தங்கியிருந்த ரிசார்ட்டுக்கு புறப்பட்டு சென்றார். சுமார் ஒரு மணிநேரம் தூத்துக்குடி நகரில் நடந்தே சென்று பொதுமக்கள், வியாபாரிகளை சந்தித்து முதல்வர் வாக்கு சேகரித்தார். முதல்வருடன் தூத்துக்குடி மக்களவை தொகுதி வேட்பாளர் கனிமொழி, அமைச்சர்கள் கீதாஜீவன், அனிதா ராதாகிருஷ்ணன், மாநகராட்சி மேயர் ஜெகன் பெரியசாமி ஆகியோரும் சென்றனர்.