இதுகுறித்து விசாரிக்குமாறு டெல்லி நீதிமன்றம் சிபிஐக்கு உத்தரவிட்டது. அதன்படி விசாரணை நடத்தி வந்த சிபிஐ கலவரத்தில் டைட்லருக்கு தொடர்பில்லை என்று 2007ம் ஆண்டும், டைட்லர் மீதான குற்றச்சாட்டுக்கு ஆதாரமில்லை என்று 2009ம் ஆண்டும் டெல்லி நீதிமன்றத்தில் அறிக்கை தாக்கல் செய்தது. இதை எதிர்த்து தொடரப்பட்ட வழக்கை விசாரித்த டெல்லி நீதிமன்றம் சிபிஐ அறிக்கையை தள்ளுபடி செய்து, டைட்லர் மீதான வழக்கை மீண்டும் விசாரிக்கும்படி சிபிஐக்கு உத்தரவிட்டது. இதைதொடர்ந்து கடந்த மாதம் ஜெகதீஷ் டைட்லரின் குரல் மாதிரியை சிபிஐ பதிவு செய்தது. இந்நிலையில் ஜெகதீஷ் டைட்லருக்கு எதிராக சிபிஐ குற்றப்பத்திரிகை தாக்கல் செய்துள்ளது. அதில், “1984ம் ஆண்டு புல்பங்காஷ் பகுதியில் கூடியிருந்த கும்பலை ஜெகதீஷ் டைட்லர் தூண்டி விட்டதால், குருத்வாரா எரிக்கப்பட்டது. 3 சீக்கியர்கள் கொல்லப்பட்டனர். அவருக்கு எதிராக புதிய ஆதாரங்கள் கிடைத்துள்ளன” என்று தெரிவிக்கப்பட்டுள்ளது.