நீதிபதி நிஷா பானு அளித்த தீர்ப்பில், செந்தில் பாலாஜியை கைது செய்தது சட்ட விரோதம் என்றும் அவரை உடனடியாக விடுதலை செய்ய வேண்டும் என்றும் கூறப்பட்டிருந்தது. நீதிபதி பரத சக்கரவர்த்தி வழங்கிய தீர்ப்பில், செந்தில் பாலாஜியை கைது செய்ததில் சட்ட விதிமீறல் இல்லை. அவர் உடல்நிலை குணமானவுடன் அமலாக்கத்துறை சம்பந்தப்பட்ட நீதிமன்றத்தை அணுகி காவலில் எடுத்து விசாரிக்க அனுமதி கோரலாம் என்றும் கூறப்பட்டிருந்தது. இரு நீதிபதிகளும் மாறுபட்ட தீர்ப்பு வழங்கியதால் இறுதி முடிவை எடுக்க 3வது நீதிபதி சி.வி.கார்த்திகேயன் நியமிக்கப்பட்டார். அவரது முன்பு நேற்று இந்த வழக்கு விசாரணைக்கு வந்தது.
அப்போது, மேகலா தரப்பில் மூத்த வழக்கறிஞர் என்.ஆர்.இளங்கோ, வழக்கறிஞர் பரணிகுமார் ஆகியோர் ஆஜராகினர். அமலாக்கத்துறை சார்பில் சொலிசிட்டர் ஜெனரல் துஷார் மேத்தா, வழக்கறிஞர் ரமேஷ் ஆகியோர் ஆஜராகினர்.
அப்போது, நீதிபதி, இந்த வழக்கில் விரைந்து முடிவெடுக்க வேண்டும் என்று உச்ச நீதிமன்றம் அறிவுறுத்தியதையும் நாம் கருத்தில் கொள்ள வேண்டும். வழக்கை வெள்ளிக்கிழமை (இன்று) மதியம் 2.15 மணிக்கு பட்டியலிடுகிறேன். அப்போது, இரு நீதிபதிகளின் தீர்ப்பின் சாராம்சத்தை நீதிமன்றத்தில் தாக்கல் செய்ய வேண்டும். வழக்கு ஆவணங்களை அமலாக்கத்துறை தரப்பு தாக்கல் செய்ய வேண்டும் என்றார்.
அப்போது, மூத்த வழக்கறிஞர் என்.ஆர்.இளங்கோ, சனிக்கிழமை (நாளை) தொடர்ந்து விசாரணை நடத்தலாம் என்று தெரிவித்தார். அதற்கு அமலாக்கத்துறை வழக்கறிஞரும் சம்மதம் தெரிவித்தார். இதைக்கேட்ட நீதிபதி, சனிக்கிழமை விசாரணையை நடத்துவதற்கு தலைமை நீதிபதியின் அனுமதி தேவை. அனுமதி கிடைத்தால் சனிக்கிழமை இந்த வழக்கை விசாரிக்கலாம். தொடர்ந்து திங்கட்கிழமையும் விசாரணை நடத்தலாம் என்று தெரிவித்து விசாரணையை தள்ளிவைத்தார்.
* கேஸ் டைரியா, ஆவணமா?
செந்தில் பாலாஜி கைது செய்யப்பட்ட நேரம் தொடர்பாக இரு தகவல்கள் உள்ளன. அதனால் கேஸ் டைரியை அமலாக்கத்துறை தாக்கல் செய்ய வேண்டும் என்று நீதிபதி கூறினார். அதற்கு செந்தில் பாலாஜி தரப்பு மூத்த வழக்கறிஞர் என்.ஆர்.இளங்கோ அமலாக்கத்துறை போலீஸ் அல்ல. அவர்களிடம் எப்படி கேஸ் டைரி இருக்கும் என்றார். அவர்களால் காவலில் எடுத்து விசாரிக்க முடியாது என்றார். அதற்கு சொலிசிட்டர் ஜெனரல் வழக்கு ஆவணங்கள் என்றுதான் கூற வேண்டும். ஆவணங்களை தாக்கல் செய்கிறோம் என்றார்.