சென்னை: சென்னையில் தங்கம் விலை மீண்டும் ரூ.46,000ஐ தாண்டியது. தங்கம் விலை கடந்த 3 மாதமாக ஏற்றம், இறக்கத்துடன் காணப்பட்டு வருகிறது. இந்நிலையில் இஸ்ரேல், ஹமாஸ் இடையிலான போர் உருவானதை தொடர்ந்து தங்கம் விலை அதிரடியாக உயர்வதும், சில நாட்களுக்கு பிறகு சற்று குறைவதுமாகவும் இருந்து வந்தது. இந்நிலையில், கடந்த 24ம் தேதி ஒரு சவரன் தங்கம் ரூ.45,400க்கு விற்கப்பட்டது. 25ம் தேதி தங்கம் விலை குறைந்து ஒரு சவரன் ரூ.45,240க்கு விற்கப்பட்டது. இந்த விலை குறைவு ஒரு நாள் கூட நீடிக்கவில்லை. 26ம் தேதி தங்கம் விலை மீண்டும் அதிரடியாக உயர்வை சந்தித்தது.
அதாவது தங்கம் விலை கிராமுக்கு ரூ.45 அதிகரித்து ஒரு கிராம் ரூ.5,700க்கும், சவரனுக்கு ரூ.360 அதிகரித்து ஒரு சவரன் ரூ.45,600க்கும் விற்கப்பட்டது. தொடர்ந்து 27ம் தேதி ரூ.40 உயர்ந்து சவரன் ரூ.45,640க்கு விற்பனையானது. இந்த நிலையில், இன்றும் தங்கம் விலை தாறுமாறாக உயர்ந்துள்ளது. அதாவது கிராமுக்கு ரூ.65 அதிகரித்து ஒரு கிராம் ரூ.5,770க்கும், சவரனுக்கு ரூ.520 அதிகரித்து ஒரு சவரன் ரூ.46,160க்கும் விற்கப்பட்டு வருகிறது. இந்த திடீர் விலை உயர்வு நகை வாங்குவோரை சற்று அதிர்ச்சிக்குள்ளாக்கியுள்ளது. அதே போல சில்லறை வர்த்தகத்தில் ஒரு கிராம் வெள்ளி விலை மாற்றமின்றி ரூ.77.50க்கு விற்பனையாகிறது. அடுத்த மாதம் 12ம் தேதி தீபாவளி வருகிறது. இந்த நேரத்தில் நிறைய பேர் நகை வாங்குவதை வழக்கமாக கொண்டுள்ளனர். தீபாவளி நேரத்தில் தங்கம் விலை உயர்வு அவர்களுக்கு மேலும் அதிர்ச்சியை ஏற்படுத்தியுள்ளது.