ரஞ்சி கோப்பை தேதி அறிவிப்பு

மும்பை: ரஞ்சி கோப்பை, விஜய் ஹசாரே, சையத் முஷ்டாக் அலி டிராபி உள்பட 2023-24 சீசன் உள்ளூர் கிரிக்கெட் தொடர்களுக்கான தேதி அட்டவணையை பிசிசிஐ நேற்று அறிவித்தது. மண்டலங்களுக்கு இடையிலான துலீப் கோப்பை தொடர் ஜூன் 28ம் தேதி தொடங்கும். 6 மண்டலங்களுக்கு இடையிலான தியோதர் கோப்பை டி20 தொடர் ஜூலை 24 – ஆகஸ்ட் 3 வரை நடத்தப்படும். நடப்பு ரஞ்சி சாம்பியனான சவுராஷ்டிரா அணியுடன் இதர இந்திய அணி மோதும் இரானி கோப்பை போட்டி அக்.1ம் தேதியும், சையத் முஷ்டாக் அலி டி20 தொடர் அக்.16ம் தேதியும் தொடங்க உள்ளன. விஜய் ஹசாரே ஒருநாள் தொடர் நவ.23 – டிச.15 வரை நடைபெறும். ரஞ்சி கோப்பை டெஸ்ட் தொடர் 2024 ஜன.5 – மார்ச் 14 வரை நடக்க்க உள்ளது. மகளிர் அணிகள் மோதும் போட்டிகளுக்கான தேதிகளும் அறிவிக்கப்பட்டுள்ளன. மண்டல அளவில் சீனியர் மகளிர் அணிகளுக்கு இடையிலான டி20 போட்டி நவ.24 – டிச.4 வரை மற்றும் சீனியர் மகளிர் ஒருநாள் தொடர் ஜன.4 – 26ல் நடைபெறும். இந்த ஆண்டு ஜூன் முதல் 2024 மார்ச் கடைசி வாரம் வரை மொத்தம் 1846 ஆட்டங்கள் நடைபெற உள்ளதாக பிசிசிஐ செயலர் ஜெய்ஷா தெரிவித்துள்ளார்.