கிராஸ் ஐலெட்: ஐசிசி டி20 உலக கோப்பையின் கடைசி லீக் ஆட்டத்தில் சி பிரிவில் உள்ள வெஸ்ட் இண்டீஸ்-ஆப்கானிஸ்தான் அணிகள் மோதின. இரு அணிகளும் தலா 3 வெற்றியுடன் ஏற்கனவே சூப்பர்-8 சுற்று வாய்ப்பை உறுதி செய்திருந்த நிலையில், முதலிடத்துக்கான மோதலாக இது அமைந்தது. கிராஸ் ஐலெட்டில் நேற்று நடந்த இபோட்டியில் டாஸ் வென்ற ஆப்கான் பந்துவீச… வெஸ்ட் இண்டீஸ் தொடக்க வீரர் பிராண்டன் கிங் 7 ரன்னில் வெளியேறி ஏமாற்றம் அளித்தார். எனினும், ஜான்சன் சார்லஸ் – நிகோலஸ் பூரன் இணைந்து 2வது விக்கெட்டுக்கு அதிரடியில் இறங்க வெஸ்ட் இண்டீஸ் ஸ்கோர் எகிறியது.
ஜான்சன் 43 ரன் (27 பந்து, 8 பவுண்டரி) விளாசி ஆட்டமிழந்தார். அடுத்த வந்த ஷாய் ஹோப் 25 ரன் (17 பந்து, 2 சிக்சர்), கேப்டன் ரோவ்மன் பாவெல் 26 ரன் (15 பந்து, 1 பவுண்டரி, 2 சிக்சர்) எடுத்து பெவிலியன் திரும்பினர். பவுண்டரியும் சிக்சருமாகப் பறக்கவிட்டு ஆப்கான் பந்துவீச்சை சிதறடித்த பூரன் 98 ரன் (53 பந்து, 6 பவுண்டரி, 8 சிக்சர்) விளாசி துரதிர்ஷ்டவசமாக ரன் அவுட்டாக, வெஸ்ட் இண்டீஸ் 20 ஓவர் முடிவில் 5 விக்கெட் இழப்புக்கு 218 ரன் குவித்தது. இந்த உலக கோப்பையின் லீக் சுற்றில் அதிகபட்ச ஸ்கோர் இதுதான். ஆந்த்ரே ரஸ்ஸல் 3, ரூதர்போர்டு 1 ரன்னுடன் ஆட்டமிழக்காமல் இருந்தனர். ஆப்கான் தரப்பில் குல்பாதின் நயீப் 2, ஒமர்சாய், நவீன் உல் ஹக் தலா 1 விக்கெட் வீழ்த்தினர்.
அடுத்து 219 ரன் எடுத்தால் வெற்றி என்ற கடினமான இலக்குடன் களமிறங்கிய ஆப்கான், 16.2 ஓவரில் 114 ரன் மட்டுமே சேர்த்து 104 ரன் வித்தியாசத்தில் தோல்வியைத் தழுவியது. அதிகபட்சமாக இப்ராகிம் ஸத்ரன் 38 ரன் (28 பந்து, 5 பவுண்டரி, 1 சிக்சர்), அஸ்மதுல்லா ஒமர்சாய் 23 ரன் (19 பந்து, 1 பவுண்டரி, 1 சிக்சர்), கேப்டன் ரஷித் கான் 18, கரிம் ஜனத் 14 ரன் எடுக்க, மற்ற வீரர்கள் சொற்ப ரன்னில் விக்கெட்டை பறிகொடுத்தனர். வெஸ்ட் இண்டீஸ் பந்துவீச்சில் ஒபெத் மெக்காய் 3, அகீல் உசைன், குடகேஷ் தலா 2, ரஸ்ஸல், ஜோசப் தலா 1 விக்கெட் அள்ளினர். ஆட்ட நாயகனாக நிகோலஸ் பூரன் தேர்வானார். இந்த வெற்றியின் மூலம் வெஸ்ட் இண்டீஸ் சி பிரிவில் 8 புள்ளிகளுடன் முதல் இடத்தை உறுதி செய்தது.
* டி20 உலக கோப்பையில் வெஸ்ட் இண்டீஸ் தனது அதிகபட்ச ஸ்கோரை பதிவு செய்தது (218). முன்னதாக, 2007ல் தென் ஆப்ரிக்காவுக்கு எதிராக 205/6 மற்றும் 2012ல் ஆஸி.க்கு எதிராக 205/5 எடுத்திருந்தது.
* பவர்பிளேயில் வெஸ்ட் இண்டீஸ் 1 விக்கெட் இழப்புக்கு 92 ரன் விளாசியது, டி20 உலக கோப்பையில் புதிய சாதனையாக அமைந்தது. 2014ல் அயர்லாந்துக்கு எதிராக நெதர்லாந்து படைத்த சாதனை (91/1) முறியடிக்கப்பட்டது.
* டி20 உலக கோப்பையில் அதிக சிக்சர் விளாசிய வெஸ்ட் இண்டீஸ் வீரர் என்ற சாதனை நிகோலஸ் பூரன் வசமானது (128 சிக்சர்). கிறிஸ் கேல் (124), எவின் லூயிஸ் (111), போலார்டு (99) அடுத்த இடங்களில் உள்ளனர்.
