அதர்வா 46 ரன் (27 பந்து, 5 பவுண்டரி, 2 சிக்சர்) விளாசி நடராஜன் வேகத்தில் சன்விர் வசம் பிடிபட்டார். அடுத்து பிரப்சிம்ரன் – ரைலீ ரூஸோ ஜோடி 2வது விக்கெட்டுக்கு 54 ரன் சேர்த்தது. 34 பந்தில் அரை சதம் அடித்த பிரப்சிம்ரன் 71 ரன் (45 பந்து, 7 பவுண்டரி, 4 சிக்சர்) விளாசி வியாஸ்காந்த் பந்துவீச்சில் விக்கெட் கீப்பர் கிளாஸன் வசம் கேட்ச் கொடுத்து ஆட்டமிழந்தார்.
ஷஷாங்க் சிங் 2 ரன் எடுத்து ரன் அவுட்டாக, ரூஸோ 49 ரன் (24 பந்து, 3 பவுண்டரி, 4 சிக்சர்) விளாசி கம்மின்ஸ் வேகத்தில் வெளியேறினார். அசுதோஷ் 2 ரன் எடுத்து நடராஜன் வேகத்தில் விக்கெட்டை பறிகொடுத்தார். கடைசி கட்டத்தில் ஜிதேஷ் ஷர்மா அதிரடியில் இறங்க, பஞ்சாப் கிங்ஸ் 20 ஓவர் முடிவில் 5 விக்கெட் இழப்புக்கு 214 ரன் குவித்தது. ஜிதேஷ் 32 ரன் (15 பந்து, 2 பவுண்டரி, 2 சிக்சர்), ஷிவம் சிங் 2 ரன்னுடன் ஆட்டமிழக்காமல் இருந்தனர். சன்ரைசர்ஸ் பந்துவீச்சில் நடராஜன் 2, கம்மின்ஸ், வியாஸ்காந்த் தலா 1 விக்கெட் வீழ்த்தினர்.
அடுத்து டிராவிஸ் ஹெட், அபிஷேக் ஷர்மா இணைந்து சன்ரைசர்ஸ் துரத்தலை தொடங்கினர். அர்ஷ்தீப் வீசிய முதல் பந்திலேயே ஹெட் கோல்டன் டக் அவுட்டாகி வெளியேற, ஐதராபாத் அணிக்கு அதிர்ச்சி தொடக்கமாக அமைந்தது. எனினும், அபிஷேக் – ராகுல் திரிபாதி ஜோடி 2வது விக்கெட்டுக்கு 29 பந்தில் 72 ரன் விளாசி வெற்றி நம்பிக்கை அளித்தனர். திரிபாதி 33 ரன் (18 பந்து, 4 பவுண்டரி, 2 சிக்சர்) விளாசி வெளியேறினார். அபிஷேக் – நிதிஷ் குமார் இணைந்து அதிரடியாக 30 பந்தில் 57 ரன் சேர்த்தனர்.
அபிஷேக் 66 ரன் (28 பந்து, 5 பவுண்டரி, 6 சிக்சர்), நிதிஷ் குமார் 37 ரன் (25 பந்து, 1 பவுண்டரி, 3 சிக்சர்), ஷாபாஸ் அகமது 3, கிளாஸன் 42 ரன் (26 பந்து, 3 பவுண்டரி, 2 சிக்சர்) எடுத்து பெவிலியன் திரும்பினர். சன்ரைசர்ஸ் 19.1 ஓவரில் 6 விக்கெட் இழப்புக்கு 215 ரன் எடுத்து அபாரமாக வென்றது. அப்துல் 11, சன்விர் 6 ரன்னுடன் ஆட்டமிழக்காமல் இருந்தனர். பஞ்சாப் பந்துவீச்சில் அர்ஷ்தீப், ஹர்ஷல் தலா 2, ஹர்பிரீத், ஷஷாங்க் தலா 1 விக்கெட் வீழ்த்தினர். அபிஷேக் ஆட்ட நாயகன் விருது பெற்றார்.