சென்னை: பிஎம்ஸ்ரீ பள்ளிகள் திட்டத்திற்காக மாநிலங்கள், யூனியன் பிரதேசங்கள் கையெழுத்திட்ட புரிந்துணர்வு ஒப்பந்தத்தில் தமிழ்நாடும் கையெழுத்திட வேண்டும் என ஒன்றிய கல்வி அமைச்சர் தர்மேந்திர பிரதான், தமிழக முதல்வருக்கு கடிதம் எழுதியுள்ளார். தமிழக பள்ளிக் கல்வித்துறையின் மூலம் செயல்படுத்தப்படும் ஒன்றிய அரசின் திட்டமான சமக்ர சிக்ஷா திட்டத்துக்கான நிதியை, ஒன்றிய அரசு நிறுத்தி வைத்துள்ளதாக எழுந்துள்ள சர்ச்சை தொடர்பாக தமிழக முதல்வர் மு.க.ஸ்டாலின் ஒன்றிய அரசுக்கு கடிதம் எழுதியிருந்தார்.
இதையடுத்து. ஒன்றிய கல்வி அமைச்சர் தர்மேந்திர பிரதான், தமிழக முதல்வருக்கு நேற்று ஒரு கடிதம் எழுதியுள்ளார். சமக்ர சிக்ஷா திட்டம் தேசிய கல்விக் கொள்கையில் வழங்கப்பட்டுள்ள வாய்ப்புகளை இணைத்து குழந்தைப் பருவத்துக்கான பொறுப்பு மற்றும் கல்விக்கான புதிய உள்ளீடுகளை கொண்டது. இந்த திட்டத்தின் கீழ் தமிழ்நாட்டில் 10 லட்சத்துக்கும் மேற்பட்ட குழந்தைகள் பயன்பெற்று வருகின்றனர். இத்திட்டத்தின் கீழ் ஒவ்வொரு மாநிலமும், யூனியன் பிரதேசமும் ஒன்றிய கல்வி அமைச்சகத்துடன் புரிந்துணர்வு உடன்படிக்கையில் கையெழுத்திட்டுள்ளன.
அதன்படி 32 மாநிலங்கள் மற்றும் யூனியன் பிரதேசங்கள் கையெழுத்திட்டு இந்த திட்டத்தின் இணைந்துள்ளன. அதைப் போல தமிழ்நாடு அரசும் இந்த திட்டத்தில் இணைய ஒப்பந்தத்தில் கையொப்பமிட, ஒன்றிய அரசின் கல்வித்துறை செயலாளர் மூலம் (கடித தேதி 15.922 மற்றும் 28.9.22, 19.12.22, 6.2.23, 13.03.23, 19.10.23, 23.2.24, 7.3.24, மற்றும் 1.7.24) தொடர்ந்து நான் கேட்டுக் கொண்டேன். இந்நிலையில், 2024-2025ம் கல்வி ஆண்டுக்கான பிஎம்ஸ்ரீ புரிந்துணர்வு ஒப்பந்தத்தில் தமிழ்நாடு அரசும் இணைய விருப்பம் தெரிவித்து கடந்த 15.3.2024ம் தேதி கடிதம் எழுதியுள்ளது அறிந்து நான் மகிழ்ச்சி அடைகிறேன்.
அதன் அடிப்படையில் ஒன்றிய கல்வித்துறை மற்றும் எழுத்தறிவுத் துறையின் மூலம் பிஎம்ஸ்ரீ ஒப்பந்த அறிக்கை தமிழ்நாட்டுக்கு அனுப்பி வைக்கப்பட்டுள்ளது. இருப்பினும் மாநில அரசு 6.7.2024ல் ஒரு திருத்தப்பட்ட புரிந்துணர்வு ஒப்பந்தத்துடன் பதிலளித்தது, அதில் தேசிய கல்விக்கொள்கை 2020 ஐ செயல்படுத்துவதைக் குறிக்கும் முக்கிய பத்தி முற்றிலும் நீக்கப்பட்டுள்ளது. தேசிய கல்விக் கொள்கை 2020 உடன் இணைந்த சமக்ரா சிக்ஷா திட்டத்தை மாநிலம் செயல்படுத்துவது போல், மாநிலத்தின் அரசுப் பள்ளிகளை மேம்படுத்துவதற்காக பிஎம்ஸ்ரீ திட்டத்தின் கீழ் தேசிய கல்விக் கொள்கை 2020ன் அனைத்து முன்முயற்சிகளையும் செயல்படுத்தவும், காட்சிப்படுத்தவும் மாநிலம் முன்வருவது பொருத்தமானதாக இருக்கும்.
குறைந்தபட்சம் 5 ஆம் வகுப்பு வரை பயிற்றுவிக்கும் ஊடகம், முன்னுரிமை தரம் 8 மற்றும் அதற்குப் பிறகு, வீட்டு மொழி, தாய்மொழி, உள்ளூர் மொழி, பிராந்திய மொழியாக இருக்கும் என்று வலியுறுத்துகிறது. எனவே, தேசிய கல்விக் கொள்கை 2020 தமிழ்நாட்டின் பள்ளிகளில் தமிழ் கற்பிக்கும் யோசனையை முழுமையாக ஆதரிக்கிறது. உண்மையில், இந்திய அரசு பன்மொழி மற்றும் தாய்மொழியில் கற்பதை ஊக்குவிக்க ஒருங்கிணைந்த முயற்சிகளை மேற்கொண்டு வருகிறது. பல்வேறு இந்திய மொழிகளைக் கற்க வசதியாக, ஆரம்ப வகுப்பு மாணவர்களுக்கான கற்பித்தல் தொடக்கம் 110 இந்திய மொழிகளில் திட்டமிடப்பட்டுள்ளன, அவற்றில் 79 மொழிகளில் தற்போது தொடங்கப்பட்டுள்ளன.
சுகாதாரம் மற்றும் கல்வியில் முன்னோக்கி நோக்கும் கொள்கைகளை தொடங்குவதோடு மட்டுமல்லாமல் அதை ஏற்றுக்கொள்வதிலும் தமிழ்நாடு முன்னணியில் உள்ளது என்பதை ஒப்புக்கொள்கிறேன். தேசிய கல்விக் கொள்கை 2020ஐ மாநிலத்தில் செயல்படுத்துவது இதேபோல் மேலும் பல சிறந்த நடைமுறைகள் வெளிப்படும் என்று நாங்கள் உண்மையிலேயே நம்புகிறோம். பிஎம்ஸ்ரீ திட்டத்திற்காக 32 மாநிலங்கள், யூனியன் பிரதேசங்கள் கையெழுத்திட்ட புரிந்துணர்வு ஒப்பந்தத்தில் கையெழுத்திடுமாறு மீண்டும் ஒருமுறை கேட்டுக்கொள்கிறேன். இவ்வாறு ஒன்றிய கல்வி அமைச்சர் தர்மேந்திர பிரதான் தனது கடிதத்தில் தெரிவித்துள்ளார்.
