இந்த சூழலில் நீட் முதுநிலை தேர்வுக்கான வினாத்தாளும் முன்கூட்டியே சமூக வலைதளங்களில் கசிந்ததாக தகவல் பரவியது. இது மாணவர்கள் மத்தியில் பெரும் கலக்கத்தை ஏற்படுத்தியுள்ளது. இதையடுத்து நாளை நடைபெறவுள்ள முதுநிலை நீட் தேர்வை ரத்து செய்ய வேண்டும் என்று உச்ச நீதிமன்றத்தில் மாணவர்கள் தரப்பில் மனு தாக்கல் செய்யப்பட்டது. மேற்கண்ட மனுக்கள் அனைத்தும் உச்ச நீதிமன்ற தலைமை நீதிபதி டி.ஒய்.சந்திரசூட் அமர்வில் நேற்று விசாரணைக்கு வந்தது. அப்போது மனுதாரர் தரப்பில் ஆஜரான மூத்த வழக்கறிஞர், “இளநிலை நீட் தேர்வில் நடந்தது போன்று, முதுநிலை நீட் தேர்வு விவகாரத்திலும் முறைகேடுகள் நடந்துள்ளது. அதுகுறித்த பிரச்சனைகள் அனைத்தும் சரி செய்யப்படும் வரை ஞாயிற்றுக்கிழமை(நாளை) நடைபெற இருக்கும் நீட் தேர்வை ஒத்தி வைக்க வேண்டும்.
குறிப்பாக ஒரு இடத்தில் காலையிலும், மற்றொரு இடத்தில் மாலையிலும் நீட் தேர்வு நடத்தப்பட உள்ளது. இது மேலும் முறைகேட்டுக்கு வழிவகுக்கும்” என்று தெரிவித்தார். இதைத்தொடர்ந்து தலைமை நீதிபதி டி.ஒய்.சந்திரசூட் பிறப்பித்த உத்தரவில், “முதுநிலை நீட் தேர்வு நடக்க இன்னும் ஒருநாள் மட்டுமே உள்ளது. அதனை 2 லட்சம் மாணவர்கள் எழுத உள்ளனர். அதனை எவ்வாறு திடீரென ஒத்தி வைக்க முடியும். அப்படி செய்யும் பட்சத்தில் 4 லட்சம் பெற்றோர்கள் பாதிப்படைவார்கள். மேலும் அத்தனை மாணவர்களின் எதிர்காலத்தையும் நாங்கள் சிக்கலில் தள்ள முடியாது. அதேபோன்று கடைசி நேரத்தில் இப்படி வைக்கப்படும் கோரிக்கையை கண்டிப்பாக ஏற்கவும் முடியாது. எனவே இந்த மனுக்களை விசாரிக்க முடியாது” என்று தெரிவித்து, வழக்கை தள்ளுபடி செய்தார்.