இதுபற்றிய அதிகாரப்பூர்வ தகவல் அறிவிக்கப்படவில்லை. அதே சமயம் இந்த தாக்குதலுக்கு நேற்று இஸ்ரேல் பதிலடி கொடுத்தது. நேற்று முதன்முறையாக லெபனான் தலைநகர் பெய்ரூட்டை குறிவைத்து இஸ்ரேல் படைகள் தீவிர தாக்குதல் நடத்தின. வடக்கு இஸ்ரேல் பகுதியில் ஹிஸ்புல்லா குழுவினர் 140 ராக்கெட்டுகளை வீசி தாக்குதல் நடத்தியதற்கும், டிரோன்கள் மூலம் தாக்குதல் நடத்தியதற்கும் பதிலடியாக இந்த தாக்குதல் நடத்தப்பட்டது. இதனால் காசாவை தொடர்ந்து இருநாடுகள் இடையே நேரடியாக போர் தொடங்கியது. லெபனான் தலைநகர் பெய்ரூட் புறநகர்ப் பகுதியை இஸ்ரேல் போர் விமானங்கள் குறிவைத்து தாக்குதல் நடத்தின. தொடர்ந்து அந்த பகுதியில் குண்டுகள் வீசப்பட்டன. இதனால் அனைத்து பகுதிகளும் தீப்பிழம்பாக காட்சி அழித்தன. மக்கள் அதிகம் வசிக்கும் பகுதியில் டிரோன்கள் மூலமும் இஸ்ரேல் பதிலடி தாக்குதலை தொடர்ந்தது. இந்த தாக்குதலை இஸ்ரேல் ராணுவம் உறுதிப்படுத்தியது. தெற்கு லெபனான் முழுவதும் ஹிஸ்புல்லா உள்கட்டமைப்பை குறிவைத்து தாக்குதல் நடத்தியதாக அது தெரிவித்துள்ளது.
கத்யுஷா ராக்கெட்டுகளுடன் எல்லையில் உள்ள ஹிஸ்புல்லா குழுவின் பல தளங்கள் குறிவைத்து அழிக்கப்பட்டன. விமானப்படை, ராணுவப்படை உள்ளிட்ட இஸ்ரேலின் அத்தனை படைகளும் முதன்முறையாக லெபனான் மீது நேற்று நேரடி தாக்குதல் நடத்தின. பெய்ரூட்டில் இஸ்ரேல் நடத்திய தாக்குதலில் குறைந்தது 3 பேர் கொல்லப்பட்டதாகவும், 17 பேர் காயமடைந்ததாகவும் லெபனான் சுகாதார அதிகாரிகள் தெரிவித்துள்ளனர். பதிலுக்கு லெபனான் தரப்பில் இருந்து இஸ்ரேல் மீது தாக்குதல் நடத்தப்பட்டது. இஸ்ரேல் எல்லைப்பகுதியில் உள்ள கோலன் ஹைட்ஸ், சபேட் மற்றும் அப்பர் கலிலி ஆகிய பகுதிகளில் ஏவுகணை தாக்குதல் நடத்தப்பட்டன. இதில் பல ஏவுகணைகள் இடைமறித்து அழிக்கப்பட்டாலும், சில ஏவுகணைகள் குடியிருப்பு பகுதியில் தாக்கியது. இதனால் இஸ்ரேல் தரப்பிலும் பெரும் பாதிப்பு ஏற்பட்டது. இதனால் கோலன் ஹைட்ஸ் மற்றும் வடக்கு இஸ்ரேலின் சில பகுதிகளில் வசிப்பவர்கள் பாதுகாப்பான இடங்களுக்கு செல்ல இஸ்ரேல் ராணுவம் எச்சரித்துள்ளது. லெபனான் மீத தாக்குதல் நடத்தி வரும் அதே வேளையில் காசாவையும் குறிவைத்து இஸ்ரேல் தாக்கியது. இதில் 15 பேர் காசாவில் கொல்லப்பட்டனர். இதனால் பெரும் பதற்றம் ஏற்பட்டுள்ளது.