மும்பை: மக்களவை தேர்தலை முன்னிட்டு பா.ஜ வெளியிட்ட முதல் வேட்பாளர் பட்டியலில் கட்சியின் மூத்த தலைவரும் ஒன்றிய அமைச்சருமான நிதின் கட்கரியின் பெயர் இல்லை. மகாராஷ்டிராவில் பா.ஜ கூட்டணியில் சிக்கல் நீடிப்பதால் அவரது பெயர் வௌியாகவில்லை என்று கூறப்படுகிறது. மூத்த தலைவர்கள் பெயர்கள் பா.ஜ பட்டியலில் இடம் பெற்ற நிலையில் கட்கரி பெயர் இடம் பெறாதது மகாராஷ்ராவில் பரபரப்பை ஏற்படுத்தியது. இந்தநிலையில் நிதின் கட்கரி மகாராஷ்டிராவில் இந்தியா கூட்டணியில் சேர்ந்து எதிர்க்கட்சிகள் சார்பாக தேர்தலில் போட்டியிட வேண்டும் என்று சிவசேனா தலைவர் உத்தவ்தாக்கரே அழைப்பு விடுத்திருந்தார்.
இதற்கு பதிலளித்த தேவேந்திர பட்நவிஸ், ‘‘கட்கரி போன்ற பெரிய தேசிய தலைவர்கள் பாஜவுக்கு முக்கியமானவர்கள். ஆனால், உத்தவ் கட்சி அவருக்கு அழைப்பு விடுக்கிறது. அந்த கட்சியே குழப்பத்தில்தான் உள்ளது. இந்த அழைப்பு சாதாரணமான ஒருவர், சில சிறிய கட்சியினர் அவருக்கு அழைப்பு விடுக்கின்றனர். இது முக்கியத்துவமற்ற நபர் யாரையோ அமெரிக்க ஜனாதிபதியாக்குவதாக கூறுவது போல உள்ளது. மகாராஷ்டிராவில் கூட்டணி பேச்சுவார்த்தை இன்னும் முடியவில்லை. இறுதியானதும் வெளியாகும் முதல் பட்டியலில் கட்கரி பெயர் இடம்பெறும்’’ என்றார்.