தானே: காங்கிரஸ் மூத்த தலைவர் ராகுல்காந்தி மகாராஷ்டிரா மாநிலம் தானேயில் அளித்த பேட்டி : தேர்தல் பத்திரங்கள் பா.ஜ பணம் பெறுவதற்காக கார்ப்பரேட் நிறுவனங்களை மிரட்ட வடிவமைக்கப்பட்டது. உலகிலேயே மிகப்பெரிய அளவில் மிரட்டி பணம் பறிக்கும் கும்பல் இது. இந்த திட்டம் பிரதமர் மோடியால் திட்டமிடப்பட்ட ஒரு பெரிய திருட்டு. தேர்தல் பத்திரங்கள் திட்டம் பிரதமரின் சிந்தனையின் உருவானது. இந்த திட்டம் குறித்து விசாரணை நடக்கும் என நம்புகிறேன். இந்தத் திட்டத்தின் மூலம் பெறப்பட்ட நிதி மூலம் மகாராஷ்டிராவில் சிவசேனா மற்றும் என்சிபி போன்ற கட்சிகளை பிளவுபடுத்தவும், எதிர்க்கட்சிகள் ஆளும் மாநில அரசுகளை கவிழ்க்கவும் பயன்படுத்தப்பட்டது.
இது கார்ப்பரேட் இந்தியாவிடமிருந்து கிரிமினல் மிரட்டி பணம் பறிக்கும் செயல். இது ஒவ்வொரு கார்ப்பரேட் நிறுவனத்துக்கும் தெரியும். ஒப்பந்தங்கள் வழங்கப்பட்டு பல மாதங்கள் கழித்து நிறுவனங்கள் பாஜவுக்கு தேர்தல் பத்திரங்களை நன்கொடையாக அளித்துள்ளன. சிபிஐ, இடி வழக்குகளை பதிவு செய்து, பின்னர் கார்ப்பரேட் நிறுவனங்கள் பாஜவுக்கு பணம் கொடுத்துள்ளன. கார்ப்பரேட் நிறுவனங்கள் பெயர் குறிப்பிடாமல் பணத்தை நன்கொடையாக வழங்குவதை அனுமதிக்கும் வகையில் இந்த திட்டம் உள்ளது. சில நிறுவனங்கள் பாஜவுக்கு முன்பு பணத்தை நன்கொடையாக வழங்கவில்லை. ஆனால் அவர்கள் மீது சிபிஐ, இடி வழக்குகள் பதிவு செய்யப்பட்ட பிறகு, அவை நன்கொடை வழங்கின. இடி மற்றும் சிபிஐ ஆகியவை பாஜ, ஆர்எஸ்எஸ் அமைப்பின் நிறுவனங்களாக மாறிவிட்டன. பாஜ அரசு மாறும் போது இதுபோன்ற செயல்களுக்கு தண்டனை விதிக்கப்படும். இது போன்ற சம்பவங்கள் இனி நடக்காது என்பதற்கு இதுவே எனது உத்தரவாதம். இவ்வாறு அவர் தெரிவித்தார்.
* ‘பா.ஜ வங்கி கணக்கை முடக்க வேண்டும்’
பெங்களூருவில் அகில இந்திய காங்கிரஸ் தலைவர் மல்லிகார்ஜுன கார்கே அளித்த பேட்டி: தேர்தல் பத்திரம் முறைகேடு புகார் தொடர்பாக உச்சநீதிமன்றம் தாமாக முன்வந்து நீதி விசாரணை கமிஷன் அமைக்க வேண்டும். உண்மை நிலை தெரியவரும் வரை, பாரதிய ஜனதா கட்சியின் வங்கி கணக்கை முடக்கி உத்தரவிட வேண்டும் என்றார்.