மாருதி சுசூகி நிறுவனம் புதிய ஸ்விப்ட் காரை அறிமுகம் செய்துள்ளது. இதில் எல்எக்ஸ்ஐ, விஎக்ஸ்ஐ, விஎக்ஸ்ஐ (ஓ), இசட்எக்ஸ்ஐ மற்றும் இசட்எக்ஸ்ஐ பிளஸ் என 5 வேரியண்ட்கள் உள்ளன. இவற்றில் மேனுவல் மற்றும் ஆட்டோமேட்டிக் கியர்பாக்ஸ்களை வாடிக்கையாளர்கள் விருப்பம் போல் தேர்வு செய்து கொள்ளலாம். துவக்க வேரியண்டான ஸ்விப்ட் எல்எக்ஸ்ஐ மேனுவல் டிரான்ஸ்மிஷன் ஷோரூம் விலை சுமார் ரூ.6.49 லட்சம் என நிர்ணயம் செய்யப்பட்டுள்ளது. டாப் வேரியண்டான இசட்எக்ஸ்ஐபிளஸ் ஏஎம்டி டூயல் டோன் ஷோரூம் விலை சுமார் ரூ.9.64 லட்சம். இந்த காரில் 1.2 லிட்டர் 3 சிலிண்டர் கொண்ட இசட் வரிசை பெட்ரோல் இன்ஜின் இடம் பெற்றுள்ளது. இது அதிகபட்சமாக 82 பிஎஸ் பவரையும், 113என்எம் டார்க்கையும் வெளிப்படுத்தும். வேரியண்ட்டுகளுக்கு ஏற்ப ஒரு லிட்டருக்கு 24.8 கிலோமீட்டர் முதல் 25.75 கி.மீ வரை மைலேஜ் வழங்கும் என நிறுவன தரப்பில் கூறப்பட்டுள்ளது. தோற்றத்திலும் மேம்பாடு செய்யப்பட்டுள்ளது. புதிய கிரில்கள், எல்இடி புரொஜக்டர் ஹெட்லாம்ப், பூமராங் எல்இடி டிஆர்எல்கள், எல்இடி டெயில் லாம்ப், ஆட்டோமேட்டிக் கிளைமேட் கன்ட்ரோல், வயர்லெஸ் சார்ஜர், 6 ஏர் பேக்குகள் என பல்வேறு அம்சங்கள் உள்ளன. மாருதி நிறுவனத்தின் அதிக வரவேற்பு கொண்ட கார்களில் ஸ்விப்ட் காரும் ஒன்று. முதல் தலைமுறை ஸ்விப்ட் கார் 2005ல் அறிமுகம் செய்யப்பட்டது.இதுவரை 30 லட்சம் கார்கள் விற்பனை செய்யப்பட்டுள்ளன.