தூத்துக்குடி வடக்கு மாவட்ட அதிமுக சார்பில் கோவில்பட்டியில் நடந்த இளைஞர் மற்றும் இளம்பெண்கள் பாசறை ஆலோசனை கூட்டத்தில் பாசறை செயலாளரும், முன்னாள் எம்எல்ஏவுமான டாக்டர் பரமசிவம் பேசியதாவது: மக்கள் யாருக்கு வேண்டுமானாலும் ஓட்டு போடலாம். நல்லவர்களை பார்த்து ஓட்டுப்போட வேண்டும். நோட்டாவுக்கு ஓட்டு போடுபவர்கள் தேசத்துரோகிகள். அண்ணாமலை ஊழலுக்கு எதிராக லேகியம் கொ டுப்பதாக கூறியிருக்கிறார்.
அவர் முதலில் கர்நாடகாவில் சென்று லேகியம் கொடுக்க வேண்டும். அங்குதான் காண்ட்ராக்டர்கள் 40 சதவீதம் லஞ்சம் வாங்குவதாக நோட்டீஸ் கொடுத்து பாஜ ஆட்சி பறிபோனது. காலில் விழுந்து செல்பவர்களுக்கு லேகியம் கொடுப்பதாக சொல்லும் அண்ணாமலை, அத்வானி காலில் தவழ்ந்து விழுந்த மோடிக்கு லேகியம் கொடுக்கட்டும்.
சீமான் பேசுவதை பார்த்தால் பிரபாகரன் இப்போது உயிரோடு இருந்தால், முதலில் சீமானைத்தான் அவர் துப்பாக்கியால் சுட்டு இருப்பார். விடுதலைப்புலிகளுடன் கூடவே இருந்து துப்பாக்கியால் சுட்டதுபோல் பேசி வருகிறார். தேர்தலில், இளைஞர் – இளம்பெண் பாசறையை சேர்ந்தவர்கள் கடுமையாக உழைக்க வேண்டும். இவ்வாறு அவர் பேசினார்.
*7.5% இடஒதுக்கீட்டை பாஜ எதிர்த்தது
பரமசிவம் பேசுகையில், ‘அதிமுக ஆட்சியின்போது ஒன்றிய பாஜ அரசு கொடுத்த நெருக்கடிகள் அதிகம். அரசு பள்ளி மாணவர்களுக்கு மருத்துவ கல்வியில் 7.5 சதவீத ஒதுக்கீடு கொடுப்பதற்கு கூட பாஜ கடும் எதிர்ப்பு தெரிவித்தது. இதுதொடர்பான கோப்புகள் ஆளுநருக்கு அனுப்பப்பட்டது. அவர் அந்த கோப்பில் கையெழுத்திடவில்லை. அவர் கையெழுத்து இல்லாமல்தான் எடப்பாடி பழனிச்சாமி இந்த 7.5% இடஒதுக்கீட்டை கொண்டு வந்தது என்று நிறைய பேருக்கு தெரிந்திருக்க வாய்ப்பிலை.தேர்தல் தேதி அறிவிக்கட்டும். அப்போது பாஜவின் அராஜகங்களை எல்லாம் அம்பலப்படுத்துவோம். ’ என்று கூறி உள்ளார்.