கேரளாவில் புதிய வாக்காளர்களை சேர்க்கும் பணிகளில் மாநில தேர்தல் ஆணையம் தீவிரமாக ஈடுபட்டு வருகிறது. இந்நிலையில், கடந்த 3 மாதங்களில் கேரளாவில் இளம் வாக்காளர்களின் எண்ணிக்கை மிகவும் அதிகரித்து உள்ளது. கடந்த வருடம் அக்டோபர் 27ம் தேதி வரைவு வாக்காளர் பட்டியல் வெளியிடப்பட்டது. இதில் 18 வயதுக்கும் 19 வயதுக்கு இடையே உள்ள இளம் வாக்காளர்கள் எண்ணிக்கை 77,176 ஆக இருந்தது.
கடந்த ஜனவரி 22ம் தேதி வெளியிடப்பட்ட இறுதி வாக்காளர் பட்டியலில் இளம் வாக்காளர்கள் எண்ணிக்கை 2,88,533ஆக உயர்ந்துள்ளது. நேற்று வரை உள்ள கணக்கின்படி இளம் வாக்காளர் எண்ணிக்கை 3,88,981 ஆக உயர்ந்து உள்ளது. வரைவு வாக்காளர் பட்டியல் வெளியிடப்பட்ட பிறகு 3 மாதங்களுக்குள் 3,11,805 இளம் வாக்காளர்கள் கூடுதலாக சேர்க்கப்பட்டு உள்ளனர். சராசரி அடிப்படையில் இது இந்தியாவிலேயே மிக அதிகமாகும். இவர்கள் அனைவரும் முதன்முதலாக வாக்களிக்க உள்ளனர் என்பது குறிப்பிடத்தக்கதாகும்.