ரோகித் ஷர்மா தலைமையிலான இந்திய அணியில், அனுபவ வீரர் விராத் கோஹ்லி சொந்த காரணங்களுக்காக முதல் 2 டெஸ்டில் இருந்து விலகியுள்ளது சற்று பின்னடைவை கொடுத்துள்ளது. எனினும் இந்திய அணியின் வலுவான பேட்டிங் வரிசை, இங்கிலாந்து சவாலுக்கு தயாராகவே உள்ளது. கே.எஸ்.பரத் விக்கெட் கீப்பராக செயல்பட உள்ளார்.
ஜடேஜா – அஷ்வின் சுழல் கூட்டணி இந்திய அணியின் முக்கிய துருப்புச்சீட்டாக இருக்கும். அதே சமயம், அதிரடி ஆல்-ரவுண்டர் பென் ஸ்டோக்ஸ் தலைமையிலான இங்கிலாந்து அணியும் சம பலத்துடன் நெருக்கடி கொடுக்க காத்திருக்கிறது. கேப்டன் ஸ்டோக்ஸ் – பயிற்சியாளர் மெக்கல்லம் இணைந்து வகுத்துள்ள ‘பேஸ்பால்’ அதிரடி வியூகம் இந்திய ஆடுகளங்களில் எடுபடுமா? என்ற கேள்வி இத்தொடர் மீதான எதிர்பார்ப்பை மேலும் அதிகரித்துள்ளது.
சமீபத்தில் பாகிஸ்தானை 3-0 என ஒயிட்வாஷ் செய்துள்ளதால் இங்கிலாந்து வீரர்கள் மிகுந்த தன்னம்பிக்கையுடன் களமிறங்குகின்றனர். இளம் ஆஃப் ஸ்பின்னர் சோயிப் பஷிர் விசா குளறுபடி காரணமாக இந்தியா வருவதில் தாமதம் ஏற்பட்டுள்ளது. இது குறித்து ஸ்டோக்ஸ் மற்றும் இங்கிலாந்து அணி நிர்வாகம் தரப்பில் கடும் அதிருப்தி தெரிவிக்கப்பட்டுள்ளது. சம பலம் வாய்ந்த அணிகள் மோதும் இந்த டெஸ்ட் தொடர் மிகவும் சுவாரசியமாக அமையும் என்பதில் சந்தேகமில்லை.
இந்தியா: ரோகித் ஷர்மா (கேப்டன்), ஷுப்மன் கில், யாஷஸ்வி ஜெய்ஸ்வால், ஷ்ரேயாஸ் அய்யர், கே.எல்.ராகுல், கே.எஸ்.பரத் (விக்கெட் கீப்பர்), துருவ் ஜுரெல் (கீப்பர்), ஆர்.அஷ்வின், ரவீந்திர ஜடேஜா, அக்சர் படேல், குல்தீப் யாதவ், முகமது சிராஜ், முகேஷ் குமார், ஜஸ்பிரித் பும்ரா (துணை கேப்டன்), ஆவேஷ் கான். இங்கிலாந்து (முதல் டெஸ்ட்): பென் ஸ்டோக்ஸ் (கேப்டன்) ஜாக் கிராவ்லி, பென் டக்கெட், ஓல்லி போப், ஜோ ரூட், ஜானி பேர்ஸ்டோ, பென் ஃபோக்ஸ், ரெஹான் அகமது, டாம் ஹார்ட்லி, மார்க் வுட், ஜாக் லீச்.