நன்றி குங்குமம் டாக்டர்
உணவியல் நிபுணர் பிச்சையா காசிநாதன்
பண்டிகைக் காலம் நெருங்கும்போது, இனிப்புகளின் சுவை மற்றும் வாசனையின் ஈர்ப்பினால் சிறிது தின்பண்டங்களை அதிகமாக உண்பதினால் ஒருவர் எடை அதிகரிப்பது சாதாரணமான நிகழ்வாகும். இருப்பினும், இந்த சுவையான உணவுகளை அதிகமாக உட்கொள்வது ஆரோக்கியமற்ற எடை அதிகரிப்புக்கு வழிவகுக்கும் மற்றும் ஒருவரின் ஆரோக்கியத்தில் எதிர்மறையான தாக்கத்தை ஏற்படுத்தும்.
உடல் எடை அதிகரிப்பதைத் தவிர்க்க நீங்கள் பண்டிகை காலங்களில் உண்ணும் உணவு அல்லது தின்பண்டங்களின் உட்கொள்ளலைக் கண்காணிப்பது முக்கியம். ஆகையால் இந்த விழாக் காலத்தில் உங்கள் ஆரோக்கியத்திற்கும் சிறந்த முறையில் சிற்றுண்டி செய்வது மற்றும் சுவை மொட்டுக்களின் தேவையை எப்படி ஈடு செய்வது என்பது குறித்த சில வழிகாட்டுதல்களை நாங்கள் வழங்குகிறோம்.
இந்த ஆண்டு விடுமுறை உணவுகளை ஆரோக்கியமாக்குவதற்கான உதவிக்குறிப்புகள்:
*இனிப்புகளை வீட்டில் தயார் செய்யுங்கள்
இனிப்புகள் இல்லாமல், இந்தியாவில் கொண்டாட்டங்கள் நிறைவடையாது. ஒவ்வொருவரும் தங்களுக்குப் பிடித்த உணவுகளை எதிர்பார்க்கிறார்கள். பிரச்சினை என்னவென்றால், கடைகளில் தயாரிக்கப்படும் இந்த இனிப்புகளில் பல கொழுப்புச் சத்து, பதப்படுத்தப்பட்ட மாவு, செயற்கை இனிப்புகள் மற்றும் வண்ணம் ஆகியவை கணிசமாக கலக்கப்படுகிறது. இந்த ஆண்டு இனிப்புகள் வாங்குவதற்குப் பதிலாக, நல்ல தரமான மற்றும் சுத்தமான பொருட்களுடன் வீட்டிலேயே தின்பண்டத்தை தயாரிக்கவும். வீட்டில் இனிப்புகள் மற்றும் தின்பண்டங்கள் செய்யும் போது சர்க்கரை மற்றும் கொழுப்பு அளவின் மீது உங்களுக்கு அதிக கட்டுப்பாடு உள்ளது. இதன் விளைவாக, நீங்கள் குற்ற உணர்ச்சியின்றி இனிப்புகளை உண்ணலாம்.
*ஆரோக்கியமான தின்பண்டங்களைத் தேர்ந்தெடுக்கவும்
உணவுக்கு இடையில் ஆரோக்கியமான தின்பண்டங்கள் பசியைக் குறைக்கும் அதே வேளையில் உங்களை முழு ஆற்றலுடனும் வைத்திருக்கும். சிறப்பு நிகழ்வுகள், விளையாட்டு அல்லது பார்வையாளர்களாக இருக்கும் போது வழங்கப்படும் சிற்றுண்டிகள், ஒட்டுமொத்த கலோரி எண்ணிக்கையை அதிகரிக்கலாம். குறைந்த உப்பு, சர்க்கரை மற்றும் கொழுப்பு உள்ளிட்ட ஆரோக்கியமான பண்டங்களை மோசமான விளைவை விளைவிக்கும் தின்பண்டங்களுக்கு பதிலாக மாற்றவும். வறுத்த தின்பண்டங்களில் வறுத்த மக்கானா, வறுத்த கொண்டைக்கடலை, முந்திரிப் பருப்புகள், தினைக் கலவைகள், முறுக்கு, சீடை, பாதாம், மற்றும் உலர்ந்த பழங்கள் ஆகியவை கடைகளில் வாங்கும் பண்டங்களை விட ஆரோக்கியமானதாகும்..
*ஆரோக்கியமான மாற்று உணவு களைத் தேடிச்செல்லுங்கள்
சரிவிகித உணவை உட்கொண்டால் உங்களுக்கு பிடித்த உணவுகள் மற்றும் இனிப்புகளை நீங்கள் கைவிட வேண்டியதில்லை. இருப்பினும், சாப்பிடுவது மகிழ்ச்சிக்காகவும் கொண்டாட்டத்திற்காகவும் மட்டுமல்ல, உங்கள் உடலுக்கு சக்தியளிக்கவும் கூட என்பதை நினைவில் கொள்ளுங்கள். உங்கள் படைப்பாற்றலைப் பயன்படுத்துங்கள். தேவையானது ஒரு சிறிய மாற்றம் மட்டுமே. உதாரணமாக, சக்கரைக்கு பதிலாக தேன் அல்லது பனை வெல்லத்தை மாற்றவும். உங்கள் செய்முறையில் நச்சுத்தன்மையுள்ள மைதாவிற்குப் பதிலாக முழு கோதுமை அல்லது ராகி அல்லது தினை போன்ற சத்தான மாவு வகைகளை சேர்க்கவும்.
*அதிகம் உண்ட தின்பண்டங்களுக்கு ஈடாக உணவைத் தவிர்க்காதீர்கள்
காலை வேளை உணவை தவிர்த்திருந்தால் உங்கள் அடுத்த உணவின் போது நீங்கள் அதிகமாக சாப்பிடுவீர்கள் அல்லது உங்கள் உடலுக்குத் தேவையானதை நீங்கள் உட்கொள்ளாவிட்டால் கொழுப்பு, சர்க்கரை நிறைந்த உணவுகளை விரும்பத் தொடங்குவீர்கள். ஆரோக்கியமான காலை உணவோடு நாளை நன்றாகத் தொடங்கலாம். புரதம் மற்றும் நார்ச்சத்து நிறைந்த காலை உணவு ஆரோக்கியமான அடுத்த வேளை உணவுக்கு உங்களை தயார்படுத்தும். பொதுவாக ஒவ்வொரு இரண்டு முதல் மூன்று மணிநேரம் இடைவெளியில் அல்லது தேவைக்கேற்ப ஆரோக்கியமான சிற்றுண்டியை சாப்பிடுங்கள்.
*ஒவ்வொரு உணவிலும் சாலட்களைச் சேர்க்கவும்
விடுமுறை நாட்களில் வீட்டில் உணவு உண்பது குறைந்து வருகிறது. வெளியில் உணவு சாப்பிட நேரும்போது சத்தான, காய்கறி சாலட்டை உட்கொள்வதன் மூலம், உங்கள் கலோரி உட்கொள்ளலை சமநிலைப்படுத்த முடியும். அதிகமாக சாப்பிடுவதைத் தடுக்கவும், விரைவில் உண்ட திருப்தி அடையவும் முடியும். இயற்கை காய்கறி சாலட் நார்ச்சத்து மற்றும் நன்மை பயக்கும் ஊட்டச்சத்துக்களைப் பெற ஒரு அருமையான முறையாகும்.
*நீங்கள் என்ன குடிக்கிறீர்கள் என்பதை கவனித்துக் கொள்ளுங்கள்
மது மக்களை அதிக பசியடையச் செய்வதாகவும், சத்தற்ற உணவு வகையாகவும் அறியப்படுகிறது. அவற்றை உட்கொள்ளும் போது உடல் அதன் தேவையற்ற சத்துகளை கொழுப்பாக சேமித்து வைக்கிறது என்பதை நாம் அறிவோம். ஏரேட்டட் குளிர் பானங்கள், சர்க்கரை அல்லது செயற்கை இனிப்புப் பானங்கள் எல்லா வகையிலும் தவிர்க்கப்பட வேண்டும். விடுமுறை நாட்களில், கிரீன் டீ, டீடாக்ஸ் தண்ணீர், தேங்காய்த் தண்ணீர், மற்றும் இயற்கைப் பழச்சாறுகளைத் தேர்வு செய்யவும்..
ஆரோக்கியமான மற்றும் சுவையான தினையால் தயாரிக்கப்பட்ட தின்பண்டங்களை எடுத்துக்கொள்வதன் மூலம் ஆரோக்கியமான உணவை சேர்க்கமுடியும். உங்களுக்குப் பிடித்தமான கடைகளில் குறைந்த கிளைசெமிக் இண்டெக்ஸ் உள்ள சிற்றுண்டிகளைத் தேர்ந்தெடுங்கள். பண்டிகை காலங்களில் நீங்கள் உட்கொள்ளும் அதிகப்படியான கலோரிகளை எரிக்க மிகவும் பயனுள்ள வழி உடற்பயிற்சியே ஆகும். இந்த பரிந்துரைகளில் கவனம் செலுத்துவதன் மூலம் விடுமுறை காலத்தில் ஆரோக்கியத்தை பராமரிக்கலாம்.
