ஆட்டம் முழுவதும் ஆதிக்கம் செலுத்தினாலும், போர்ச்சுகலால் ஒரு கோல் கூட போட முடியவில்லை. சுலோவேனியாவுக்கு அரிதாக கிடைத்த வாய்ப்பையும் போர்ச்சுகல் கோல்கீப்பர் கோஸ்டா துடிப்பாக செயல்பட்டு தடுத்தார். 90 நிமிட ஆட்டம் 0-0 என டிராவில் முடிய, கூடுதலாக அரை மணி நேரம் வழங்கப்பட்டது. 103வது நிமிடத்தில் கிடைத்த பெனால்டி கிக் வாய்ப்பை பயன்படுத்தி கோல் அடிக்க ரொனால்டோ மேற்கொண்ட முயற்சியை ஒப்லாக் அற்புதமாகத் தடுத்தார். ரொனால்டோவின் ஒவ்வொரு கோல் முயற்சியும் வீணாகும்போது அவர் சோகமாவதும், மற்ற வீரர்கள் தேற்றுவதும் தொடர்கதையாக இருந்தது.
கூடுதல் நேரமும் 0-0 என கோலின்றி முடிவுக்கு வந்ததை அடுத்து பெனால்டி ஷூட் அவுட் கடைப்பிடிக்கப்பட்டது (தலா 5 வாய்ப்பு). அதில் சுலோவேனியா வீரர்களின் 3 வாய்ப்புகளை போர்ச்சுகல் கோல் கீப்பர் கோஸ்டா முறியடித்தார். அதே சமயம், போர்ச்சுகல் தரப்பில் ரொனால்டோ, பெர்னாண்டஸ், பெர்னார்டோ சில்வா துல்லியமாக கோல் அடிக்க… போர்ச்சுகல் 3-0 என்ற கோல் கணக்கில் வென்று காலிறுதிக்கு முன்னேறியது. முன்னதாக, பிரான்ஸ் – பெல்ஜியம் மோதிய ஆட்டத்தின் 85வது நிமிடத்தில் பெல்ஜியம் வீரர் வெர்டோனகனின் சுய கோலால் பிரான்ஸ் 1-0 என வெற்றி பெற்றது. ஜூலை 5ம் தேதி நள்ளிரவு நடக்கும் 2வது காலிறுதியில் பிரான்ஸ்-போர்ச்சுகல் அணிகள் பலப்பரீட்சை நடத்த உள்ளன.