விசாரணையில், சுடப்பட்டவர் கன்னியாகுமரி மாவட்டம், நாகர்கோவில், வாத்தியார் விளை அம்மன் கோயில் தெரு 4வது வீதியை சேர்ந்த ஏ பிளஸ் ரவுடி ஆல்வின் (40) என தெரியவந்தது. கோவை மேட்டுப்பாளையம் ரோட்டில் உள்ள ஒரு சினிமா தியேட்டர் மற்றும் அதை சுற்றியுள்ள 100 கோடி ரூபாய் சொத்துக்களை அபகரிக்க ஆவாரம்பாளையம் ரோட்டை சேர்ந்த ரவுடி சத்திய பாண்டி (34) தலைமையிலும், மற்றொரு பிரிவினர் சஞ்சய் ராஜா (37) தலைமையிலும் மோதி வந்தனர். இதில், சஞ்சய் ராஜா குரூப்பை சேர்ந்த தில்ஜித் (44), ஆல்வின் உள்ளிட்ட சிலர், சத்திய பாண்டியை கடந்த 2023 பிப்ரவரி மாதம் ஓட ஓட விரட்டி அரிவாளால் வெட்டியும், துப்பாக்கியால் சுட்டும் கொலை செய்தனர். இந்த வழக்கில் சஞ்சய் ராஜா, ஆல்வின் உள்பட 10க்கும் மேற்பட்டவர்களை போலீசார் கைது செய்தனர். இவர்கள் கோவை சிறையில் அடைக்கப்பட்டிருந்தனர். இந்த கொலை மட்டுமின்றி கன்னியாகுமரி மாவட்டம் வடசேரியில் ஒரு கொலை, திருநெல்வேலியில் ஒரு கொலை, 4 கொலை முயற்சி, திருட்டு, வழிப்பறி என 15 வழக்குகள் ஆல்வின் மீது உள்ளன. பல்வேறு ரவுடி கும்பலுடன் ஆல்வினுக்கு நெருங்கிய தொடர்பு உள்ளது தெரியவந்தது.