கோவை: கோவை மாவட்டம் கிணத்துக்கடவு அடுத்த வடசித்தூர் பகுதியில் உள்ள பெரியார் சிலை அவமதிப்பு செய்யப்பட்டுள்ளது. கோவை மாவட்டம், கிணத்துக்கடவு தாலுகா கிராம ஊராட்சிக்கு உட்பட்ட பெரியார் நினைவு சிலை அமைக்கப்பட்டுள்ளது. இங்கு பல்வேறு தரப்பினர் சிலை உடைப்பு செயலில் ஈடுபட்டு வருவதால், இச்சிலையை அப்பகுதியை சேர்ந்தவர்கள் கூண்டு அமைத்து பாதுகாத்து வந்தனர்.
இந்நிலையில் பெரியார் சிலை மீது மாட்டுச்சாணம் வீசப்பட்டிருப்பதை கண்டு அதிர்ச்சி அடைந்தனர். இதையடுத்து மக்கள் போலீசாருக்கு தகவல் அளித்தனர். தகவல் அறிந்து வந்த போலீசார் பெரியார் சிலையை தண்ணீர் விட்டு சுத்தம் செய்தனர். பெரியார் சிலை அவமதிக்கப்பட்டதை அடுத்து கிணத்துக்கடவு போலீசார் வழக்கு பதிவு செய்து விசாரணை நடத்தி வருகின்றனர். பெரியார் சிலையை அவமதிக்கும் வகையில் நடைபெற்றுள்ள இச்சம்பவம் அப்பகுதியில் பரபரப்பை ஏற்படுத்தியுள்ளது.
