சென்னை: “விக்கிரவாண்டி இடைத்தேர்தலில் கிடைத்த வெற்றி, வருகிற 2026 சட்டசபை தேர்தலிலும் எதிரொலிக்கும்” என்று அமைச்சர் பொன்முடி கூறியுள்ளார். திமுக துணை பொதுச்செயலாளரும், தமிழக உயர்க்கல்வித்துறை அமைச்சருமான க.பொன்முடி சென்னை அண்ணா அறிவாலயத்தில் நேற்று அளித்த பேட்டி:
விக்கிரவாண்டி தொகுதி இடைத் தேர்தலில் திமுக சார்பில் போட்டியிட்ட அன்னியூர் சிவா, இதுவரை நடைபெற்ற இடைத்தேர்தலைகளை காட்டிலும் மிக அதிக வாக்குகள் வித்தியாசத்தில் வெற்றி பெற்றுள்ளார். இந்த வெற்றி முதல்வர் மு.க.ஸ்டாலினுக்கு கிடைத்த வெற்றி. முதல்வர் மு.க.ஸ்டாலினின் 3 ஆண்டுகால ஆட்சியின் சாதனைகளுக்கு கிடைத்த வெற்றி.
திமுகவுக்கு வாக்களித்த மக்களுக்கு நன்றி. விளையாட்டு துறை அமைச்சர் உதயநிதி ஸ்டாலின், விக்கிரவாண்டி தொகுதியில் 2 நாட்கள் தீவிர பிரசாரம் செய்தார். இது, வெற்றிக்கு காரணமாக அமைந்தது. விக்கிரவாண்டி இடைத் தேர்தலில் கிடைத்த இந்த வெற்றி, வருகிற 2026 சட்டசபை தேர்தலிலும் எதிரொலிக்கும். தமிழகத்தில் 234 சட்டசபை தொகுதிகளிலும் இந்த வெற்றி பிரதிபலிக்கும்.