புதுடெல்லி: மக்களவை தேர்தலோடு சேர்ந்து ஆந்திரா, ஒடிசா, அருணாச்சல பிரதேசம் மற்றும் சிக்கிம் சட்டப்பேரவைகளுக்கும் தேர்தல் தேதியை தேர்தல் ஆணையம் நேற்று முன்தினம் அறிவித்தது. இதில் மக்களவை தேர்தல் 7 கட்டங்களாக ஏப்ரல் 19ம் தேதி முதல் ஜூன் 1ம் தேதி வரை நடத்தப்பட உள்ளன. சிக்கிம், அருணாச்சலில் தேர்தல் ஒரே கட்டமாக ஏப். 19ம் தேதியும், ஆந்திராவில் மக்களவை, சட்டப்பேரவை தேர்தல் மே 13ம் தேதியும் நடத்தப்பட உள்ளது. ஒடிசாவில் தேர்தல் 4 கட்டங்களாக நடக்கிறது.
இதில், சிக்கிம், அருணாச்சல் சட்டப்பேரவையின் ஆயுட்காலம் வரும் ஜூன் 2ம் தேதியுடன் முடிவடைகிறது. ஆனால், ஜூன் 4ம்தேதிதான் வாக்கு எண்ணிக்கை நடைபெறும் என்று தேர்தல் ஆணையம் அறிவித்திருந்தது பெரும் அரசியலமைப்பு சட்ட சிக்கலை உருவாக்கும் என்று சட்ட நிபுணர்கள் கருத்து தெரிவித்திருந்தனர். இந்நிலையில், அருணாச்சல பிரதேசம், சிக்கிம் சட்டப்பேரவை தேர்தலில் பதிவான வாக்குகள் ஜூன் 2ம் தேதியே எண்ணப்படும் என்று தேர்தல் ஆணையம் நேற்று அறிவித்தது.
அம்மாநில சட்டப்பேரவைகளின் ஆயுட்காலம் ஜூன் 2ல் முடிவடைவதால் இந்த முடிவு எடுக்கப்பட்டுள்ளதாக அந்த அறிவிப்பில் தெரிவிக்கப்பட்டுள்ளது. ஆனால், அந்த இரு மாநிலங்களிலும் மக்களவை தேர்தலில் பதிவான வாக்குகள் ஏற்கனவே அறிவித்தபடி ஜூன் 4ல் எண்ணப்படும். சட்டப்பேரவையின் ஆயுட்காலம் முடிவடையும் நாள் கூட தெரியாமலா? தேர்தல் ஆணையம் தேர்தல் அட்டவணையை தயாரித்தது என்ற கேள்வியை அரசியல் கட்சிகள் எழுப்பியுள்ளன.