பெரம்பலூர் நகரில் நேற்றிரவு 8.30 மணி முதல் 9.30 மணி வரை கன மழை கொட்டியது. இதேபோல் செட்டிக்குளம், பாடாலூர் மற்றும் சுற்று வட்டாரங்களில் மழை பெய்தது. அரியலூர் மாவட்டம் ஆண்டிமடம் வட்டார பகுதிகளில் காற்றுடன் 2 மணி நேரத்துக்கு மேல் மழை பெய்தது. ஆண்டிமடத்தில் செவ்வாய் கிழமையையொட்டி நேற்றிரவு வாரச்சந்தை கூடியது. வியாபாரிகள் காய்கறிகளை மூட்டை மூட்டையாக இறக்கி வைத்திருந்தனர். திடீர் மழையால் வியாபாரம் பாதித்தது.
வியாபாரிகளும், பொதுமக்களும் அவதிப்பட்டனர். குன்னத்தில் மாலை 5 மணியிலிருந்து மழை பொழிந்தது. 6 மணியளவில் குன்னம் அருகே உள்ள கீழப்புலியூரில் சுமார் அரை மணி நேரம் ஆலங்கட்டி மழை பெய்தது. சிறியவர்கள் முதல் பெரியவர்கள் வரை ஆலங்கட்டிகளை கையில் பிடித்து விளையாடி மகிழ்ந்தனர். கரூர் மாவட்டத்தில் மாலை 6 மணி முதல் 8 மணி வரை பலத்த மழை பெய்தது. திருச்சியில் நேற்றிரவு 7.30 மணிக்கு காற்றுடன் லேசான மழை பொழிந்தது. இந்த மழை இரவு 10.30 மணி வரை தொடர்ந்தது.