இந்த வீழ்ச்சியால் ஹிண்டன் பர்க் நிறுவனமும் பல லட்சம் டாலர் வருமானம் ஈட்டியதாகவும் கூறப்படுகிறது. இதனிடையே, இந்த விவகாரம் பற்றி விசாரணை நடத்திய வந்த இந்திய பங்கு பரிவர்த்தனை கட்டுப்பாட்டு வாரியமான செபி, ஹிண்டன்பர்க்கிற்கு நோட்டீஸ் அனுப்பியிருந்தது. இதைத் தொடர்ந்து, செபி மீதும் ஹிண்டன் பர்க் குற்றச்சாட்டை முன்வைத்துள்ளது. அதில், அதானி நிறுவன பங்குகளை ஷார்ட் செல்லிங் முறையில் விற்ற முறைகேட்டில் கோடக் மகிந்திரா வங்கிக்குத் தொடர்பு உள்ளதை செபி வேண்டுமென்றே மறைத்து விட்டதாகக் குற்றம் சாட்டியுள்ளது.
இதுகுறித்து ஹிண்டன் பர்க் வெளியிட்டஅறிக்கையில் கூறியிருப்பதாவது: செபி 46 பக்க நோட்டீசை அனுப்பியுள்ளது. அதில் மகிந்திரா வங்கி பெயரை குறிப்பிடவில்லை. அதானி பங்குகளை ஷார்ட் செல்லிங் எனப்படும் பங்குகள் இல்லாமலேயே விற்று லாபம் ஈட்டும் முறையில் வர்த்தகம் செய்ய, கோடக் மகிந்திரா வங்கி ஒரு நிதியத்தை ஏற்படுத்தியது. அதனைப் பயன்படுத்தி, பெயர் தெரியாத முதலீட்டாளர் ஒருவர் இந்திய பங்குச்சந்தையில் அதானி பங்குகளை ஷார்ட் செல்லிங் முறையில் விற்று லாபம் ஈட்டியுள்ளார். ஆனால், இந்த விவகாரத்தில் விசாரணை நடத்திய செபி, கோடக் மகிந்திரா வங்கியின் பெயரை மறைத்துள்ளது. கோடக் வங்கி ஏற்படுத்திய நிதியத்தை கே-இந்தியா ஆப்பார்சூனிட்டீஸ் பண்ட் எனவும் கோடக் பெயரை ‘கேஎம்ஐஎல்’ எனவும் குறிப்பிட்டுள்ளது. இதன்மூலம், இந்த வங்கியின் நிறுவனர் உதய் கோடக்கை காப்பாற்ற முயற்சித்துள்ளது. இவ்வாறு ஹிண்டன் பர்க் தெரிவித்துள்ளது.