வேலூர், டிச.27: ேவலூர் மாவட்டத்தில் மிக்ஜாம் புயல் மழையால் 132.60 ஹெக்டேர் பரப்பிலான பயிர் சேதத்திற்கு ₹22.40 லட்சம் இழப்பீடு கேட்டு அரசுக்கு அறிக்கை அனுப்பி வைக்கப்பட்டுள்ளதாக வேளாண் துறை அதிகாரிகள் தெரிவித்தனர். தமிழகத்தில் கடந்த சில வாரங்களுக்கு முன்பு மிக்ஜாம் புயல் காரணமாக சென்னை, திருவள்ளூர், காஞ்சிபுரம், செங்கல்பட்டு ஆகிய 4 மாவட்டங்களில் அதி கனமழை பெய்து வெள்ளப்பெருக்கு ஏற்பட்டது. இதேபோல் வேலூர் மற்றும் ராணிப்பேட்டை ஆகிய மாவட்டங்களில் ஒரு சில இடங்களில் கனமழை பெய்தது.
வேலூர் மாவட்டத்தில் வேலூர், காட்பாடி, அணைக்கட்டு, கே.வி.குப்பம், குடியாத்தம் ஆகிய 5 ஒன்றியங்களில் பயிரிடப்பட்டிருந்த 132.60 ஹெக்டர் நெல், மணிலா ஆகியவை சேதமானது. இதனால் 241 விவசாயிகள் பாதிக்கப்பட்டனர். இவர்களுக்கு இழப்பீடாக ₹22.40 லட்சம் இழப்பீடு கேட்டு மாவட்ட நிர்வாகம் சார்பில் தமிழக அரசுக்கு அறிக்கை அனுப்பப்பட்டுள்ளது. அதன்பேரில் அரசு நிதி ஒதுக்கீடு செய்ததும் பாதிக்கப்பட்ட 241 பேருக்கும் இழப்பீடு தொகை விரைவில் வழங்கப்படும் என மாவட்ட வேளாண்துறை அதிகாரிகள் தெரிவித்தனர்.