முசிறி, ஏப்.16: முசிறி அருகே விவசாயியின் வீட்டில் பூட்டைஉடைத்து உள்ளே புகுந்து பீரோவில் இருந்த 5 பவுன் நகைகளை மர்ம நபர்கள் திருடிச் சென்றனர். இதுகுறித்து முசிறி போலீசார் விசாரணை நடத்தி வருகின்றனர். திருச்சி மாவட்டம், முசிறி அருகே சேருகுடி திராவிடன் காலனியைச் சேர்ந்த பெரியண்ணன் மகன் சீனிவாசன் (65). இவரது குடும்பத்தினர் நிகழ்ச்சி ஒன்றுக்கு வெளியூர் சென்று இருந்த நிலையில் இவர் தனது வீட்டை பூட்டிவிட்டு வயல்காட்டில் சென்று தண்ணீர் பாய்ச்சி விட்டு வீடு திரும்பியபோது முன்கதவு திறந்து கிடந்ததைக் கண்டு அதிர்ச்சியடைந்தார்.
பின்னர் வீட்டினுள் சென்று பீரோவை பார்த்தபோது பீரோவில் உள்ள லாக்கரில் வைத்திருந்த இரண்டு பவுன் செயின், மூன்று பவுன் நெக்லஸ் ஆகியவை திருட்டு போனது தெரியவந்தது. இதுகுறித்து சீனிவாசன் முசிறி காவல் நிலையத்தில் கொடுத்த புகாரின்பேரில் காவல் உதவி ஆய்வாளர் கருணாநிதி வழக்கு பதிவு செய்து விசாரணை மேற்கொண்டுள்ளார். விசாரணையில் சீனிவாசன் வீட்டை பூட்டிவிட்டு சாவியை பக்கத்தில் மறைவிடத்தில் வைத்துச் சென்றதாகவும், இதனால் திருடன் சாவியை எடுத்து பூட்டைதிறந்து நகையை திருடிச் சென்றதாக விசாரணையில் தெரியவந்தது.