நெல்லை : நெல்லையில் தற்போது சின்ன வெங்காயம் அதன் அளவுகள் மற்றும் தரத்தைப் பொறுத்து குறைந்தது ரூ.20 முதல் ரூ.32 வரை சில்லறை விலைக்கு விற்கப்படுகிறது. இதில் சின்ன வெங்காயத்தை விவசாயிகளிடம் இருந்து வாங்கி விற்பனை செய்யும் வியாபாரிகளுக்கு நல்ல லாபம் கிடைத்தாலும், அதை உற்பத்தி செய்யும் விவசாயிகளுக்கு போதிய லாபம் கிடைக்காத நிலை உள்ளது. இதையடுத்து சில இடங்களில் விவசாயிகள் நேரடியாகவே வெங்காய விற்பனையில் ஈடுபட்டுள்ளனர். இதுகுறித்து தாழையூத்து அடுத்துள்ள தென்கலம் பகுதியில் வயலை ஒட்டியுள்ள சாலையோரம் சின்ன வெங்காயம் விற்பனை செய்து கொண்டிருந்த கீழத்தென்கலத்தைச் சேர்ந்த விவசாயி முருகனிடம் கேட்டபோது,”நான் அரை ஏக்கரில் சின்ன வெங்காயம் பயிரிட்டுள்ளேன். இதற்கு விதை உள்ளி, பூச்சி மருந்து, உரம், களை வெட்டுகூலி, உழவுகூலி உள்பட அனைத்தும் சேர்த்து ரூ.30 ஆயிரம் வரை செலவாகியுள்ளது. இதிலிருந்து 1,500 கிலோ சின்ன வெங்காயம் கிடைக்கும். தற்போது உற்பத்தி அதிகம் இருந்தாலும் விவசாயிகளுக்கு போதிய விலை கிடைக்கவில்லை.
…