ஈரோடு, ஜன. 12: பொங்கல் விழாவை முன்னிட்டு மஞ்சள் மார்க்கெட்டுக்கு 5 நாள் விடுமுறை விடப்பட்டுள்ளது. ஈரோடு மாவட்டத்தில் மஞ்சள் விற்பனைக்காக பெருந்துறை அருகே கருமாண்டிசெல்லிபாளையத்தில் உள்ள ஒழுங்குமுறை விற்பனை கூடம், ஈரோடு செம்மாம்பாளையத்தில் உள்ள மஞ்சள் மார்க்கெட் மற்றும் ஈரோடு, கோபி ஆகிய வேளாண்மை உற்பத்தியாளர்கள் கூட்டுறவு விற்பனை சங்கங்கள் உள்ளன. இங்கு வார வேலை நாள்களில் மஞ்சள் ஏலம் நடைபெற்று வருகிறது. பொங்கல் விழாவை முன்னிட்டு ஈரோடு மஞ்சள் மார்க்கெட்டுகளுக்கு நாளை (13ம் தேதி) முதல் வரும் 17ம் தேதி வரை 5 நாள்கள் விடுமுறை அளிக்கப்படுகிறது. வரும் 18ம் தேதி முதல் வழக்கம்போல் மஞ்சள் ஏலம் நடைபெறும்.