சென்னை: பிளஸ் 1 வகுப்புகளில் படித்து வரும் மாணவர்களுக்கான பொதுத்தேர்வு நாளை தொடங்குகிறது. இந்த தேர்வில் தமிழகம், புதுச்சேரி பள்ளிகளில் படிக்கும் 8 லட்சத்து 85 ஆயிரம் பேர் எழுதுகின்றனர். தமிழகம் மற்றும் புதுச்சேரியில் இயங்கி வரும் அரசு மற்றும் தனியார் பள்ளிகளில் படித்து வரும் பிளஸ் 1 மாணவ மாணவியருக்கான பொதுத் தேர்வு நாளை(10ம் தேதி) தொடங்குகிறது. இதில் மொத்தம் 8 லட்சத்து 85 ஆயிரத்து 53 மாணவ மாணவியர் தேர்வு எழுத தங்கள் பெயர்களை பதிவு செய்துள்ளனர். தமிழக பள்ளிகளில் இருந்து 8 லட்சத்து 69 ஆயிரம் மாணவ மாணவியர் பதிவு செய்துள்ளனர். அவர்களில் 4 லட்சத்து 26 ஆயிரத்து 917 பேர் மாணவர்கள். 4 லட்சத்து 42 ஆயிரத்து 989 பேர் மாணவியர். மூன்றாம் பாலினத்தவர்கள் 2 பேரும் தேர்வு எழுத பதிவு செய்துள்ளனர். புதுச்சேரியில் இயங்கும் பள்ளிகளில் இருந்து 15 ஆயிரத்து 145 மாணவ மாணவியர் பதிவு செய்துள்ளனர். இவர்கள் தவிர பிளஸ் 1 தேர்வை தனித் தேர்வர்களாக தேர்வு எழுத 5 ஆயிரத்து 673 மாணவ -மாணவியர் பதிவு செய்துள்ளனர். மாற்றுத் திறனாளிகள் 5 ஆயிரத்து 299 பேர் பதிவு செய்துள்ளனர். சிறைவாசிகள் 99 பேரும் பதிவு செய்துள்ளனர். பள்ளி மாணவர்களுக்காக 3119 தேர்வு மையங்கள் அமைக்கப்பட்டுள்ளன. தனித் தேர்வர்களுக்காக 115 தேர்வுமையங்கள் அமைக்கப்பட்டுள்ளது. இதுதவிர சிறைத் தேர்வு மையங்கள் 9 அமைக்கப்பட்டுள்ளன. பிளஸ் 1 தேர்வு அறைக் கண்காணிப்பு பணியில் 47,315 ஆசிரியர்கள் நியமிக்கப்பட்டுள்ளனர். பறக்கும் படையினர் 3050 உருவாக்கப்பட்டுள்ளது. பள்ளி மாணவர்களில் அறிவியல் பாடத் தொகுதியின் கீழ் மொத்தம் 5 லட்சத்து 50 ஆயிரத்து 186 மாணவ மாணவியரும், வணிகவியல் பாடத் தொகுதியின் கீழ் மொத்தம் 2 லட்சத்து 69 ஆயிரத்து 77 மாணவ மாணவியரும், கலை பாடத் தொகுதியின் கீழ் 15 ஆயிரத்து 362 மாணவ மாணவியரும், தொழில் கல்வி பாடத் தொகுதியின் கீழ் 50 ஆயிரத்து 428 மாணவ மாணவியரும் பதிவு செய்துள்ளனர்….