ஜெயங்கொண்டம், ஏப்.15: அரியலூர் மாவட்டம் ஜெயங்கொண்டத்தில் போக்குவரத்து விதிமுறைகளை கடைப்பிடிக்காத வாகன ஓட்டிகள் மீது போலீசார் அபராதம் உள்ளிட்ட பல்வேறு நடவடிக்கைகளில் ஈடுபட்டு வருகின்றனர். இந்நிலையில் சில நாட்களாகவே இளைஞர்கள் 8 முதல் 9 மணி வரை இரவு நேரங்களில் அதிகவேக பைக்குகளை வைத்துக்கொண்டு பைக் ரேஸ் செல்வதாக புகார் வந்த வண்ணம் இருந்தது. இந்த நிலையில் தமிழ் புத்தாண்டை முன்னிட்டு நேற்று முன்தினம் இரவு திருச்சி-சிதம்பரம் பைபாஸ் ரோட்டில் தனியார் கல்லூரி அருகே 10 பேர் பைக் ரேசில் ஈடுபட்டதாக பொதுமக்கள் போக்குவரத்து போலீஸ் இன்ஸ்பெக்டர் சாஹிராபானுவுக்கு தகவல் தெரிவித்தனர்.
தகவல் அறிந்து அங்கு சென்ற இன்ஸ்பெக்டர் சாஹிராபானு மற்றும் ஜெகன்நாத் தலைமையிலான போலீசார் 5 வாலிபர்களை பிடித்து விசாரணை செய்தனர். தொடர்ந்து அவர்களை போலீஸ் நிலையம் அழைத்து சென்று பைக்குகளை பறிமுதல் செய்து விசாரித்து வருகின்றனர். மேலும் இது சம்பவம் குறித்து அவரது பெற்றோர்களுக்கு தகவல் தெரிவிக்கப்பட்டது.