கோவை, பிப். 29: கோவையின் காவல் தெய்வமான பெரியகடை வீதி கோனியம்மன் கோயில் திருவிழா நேற்று கோலாகலமாக நடந்தது. கோனியம்மன் கோயில் திருவிழா கடந்த மாதம் 13-ம் தேதி பூச்சாட்டு விழாவுடன் துவங்கியது. இதனை தொடர்ந்து 20-ம் தேதி கொடியேற்றம், அக்னிசாட்டு நடந்தது. தினமும் பெண்கள் கொடி கம்பத்திற்கு நீருற்றி வழிபட்டு வந்தனர். திருவிழா நாட்களில் அம்மன் புலி வாகனம், கிளி வாகனம், சிம்ம வாகனம், அன்ன வாகனம், காமதேனு வாகனம், வெள்ளை யானை வாகன திருவீதி உலா நடந்தது.