ராமேஸ்வரம், ஜூன் 12:ராமேஸ்வரத்தில் மீன்வளத்துறை அதிகாரிகள் நாட்டுப் படகுகள் ஆய்வை நேற்று துவக்கினர். ராமேஸ்வரம், சங்குமால், ஓலைக்குடா, தங்கச்சிமடம், பாம்பன் உள்ளிட்ட மீனவ கிராமங்களில் மீன்வளத் துறை துணை இயக்குநர் பிரபாவதி, உதவி இயக்குநர் அப்துல் காதர் ஜெய்லானி ஆகியோரின் மேற்பார்வையில் நாட்டுப் படகுகள் ஆய்வு நேற்று துவங்கியது.
ஆய்வில் தமிழ்நாடு கடல் மீன்பிடி ஒழுங்குச் சட்டத்தின்படி மீனவக் கிராமங்களில் கரையில் நிறுத்தி வைக்கப்பட்டிருந்த படகுகளின் பதிவுச் சான்று, மீன்பிடி உரிமம், வரி விலக்கு அளிக்கப்பட்ட டீசல் பாஸ் புத்தகம், மீன்வளம் மற்றும் மீனவர் நலத்துறை மூலம் வழங்கப்பட்டுள்ள தொலைத்தொடர்பு கருவிகள், கடல் பயணத்தின் போது பயன்படுத்தப்படும் பாதுகாப்புக் கருவிகள் ஆகியவற்றை மீன்வளத் துறையினா் ஆய்வு செய்தனர். படகுகளில் பதிவு எண்கள் தெளிவாக தெரியும்படி எழுதி வைக்க வேண்டும். பதிவு செய்யப்படாத நாட்டு மற்றும் பைபர் படகுகளை விரைவில் பதிவு செய்ய வேண்டும் என படகு உரிமையாளா்களுக்கு அறிவுறுத்தப்பட்டது.